Në emisionin e fundit për këtë vit të programit “Fokusi Ynë”, i ftuar ishte Lendrit Qeli, Udhëheqës i Zyrës për Komunitete dhe Kthim (ZKK) në Komunën e Rahovecit, njëherësh edhe Udhëheqës i Kolegjiumit të Zyrave Komunale për Komunitete dhe Kthim në kuadër të Asociacionit të Komunave të Kosovës (AKK).

Gjatë emisionit, Qeli foli gjerësisht për rolin dhe rëndësinë e Zyrave për Komunitete dhe Kthim, si në nivel lokal ashtu edhe në nivel të Kosovës, duke theksuar se këto zyra përfaqësojnë një nga mekanizmat kyç institucionalë për mbrojtjen e të drejtave, integrimin dhe adresimin e nevojave të komuniteteve jo-shumicë.

Ai ndaloi në mënyrë të veçantë te përvoja e ZKK-së në Rahovec, duke përshkruar angazhimin e vazhdueshëm të zyrës në identifikimin dhe trajtimin e problemeve me të cilat përballen komunitetet Rom, Ashkali, Egjiptian dhe komunitetet e tjera jo-shumicë. Sipas tij, kërkesat e komuniteteve lidhen kryesisht me arsimimin, punësimin, strehimin, qasjen në shërbime publike, përfshirjen institucionale dhe sigurinë sociale, çështje që kërkojnë koordinim të vazhdueshëm ndërinstitucional.

Në “Fokusi Ynë”, Qeli foli edhe për sfidat me të cilat përballen vetë Zyrat për Komunitete dhe Kthim, përfshirë mungesën e burimeve të mjaftueshme financiare dhe njerëzore, kapacitetet e kufizuara operative, si dhe nevojën për mbështetje më të madhe strukturore. Ai theksoi se, pavarësisht këtyre vështirësive, zyrat vazhdojnë të jenë pika e parë e kontaktit për komunitetet dhe një zë i rëndësishëm i tyre brenda institucioneve komunale.

Si udhëheqës i Kolegjiumit të Zyrave Komunale për Komunitete dhe Kthim, Lendrit Qeli theksoi rëndësinë e koordinimit dhe bashkëpunimit ndërmjet komunave, si dhe nevojën për shkëmbim përvojash dhe harmonizim të praktikave të mira. Ai vuri në dukje se përmirësimi i pozitës së komuniteteve kërkon qasje të unifikuar dhe mbështetje të qëndrueshme në nivel vendi.

Një pjesë e rëndësishme e diskutimit iu kushtua rolit të nivelit qendror, ku Qeli bëri thirrje për më shumë mbështetje institucionale, financiare dhe politike ndaj Zyrave për Komunitete dhe Kthim. Sipas tij, vetëm përmes një angazhimi serioz dhe të koordinuar nga institucionet qendrore mund të fuqizohen këto zyra dhe të adresohen në mënyrë efektive nevojat reale të komuniteteve.

Emisioni përmbyllës i “Fokusi Ynë” për këtë vit shërbeu si një reflektim i rëndësishëm mbi sfidat, arritjet dhe perspektivat e punës me komunitetet jo-shumicë, duke theksuar rolin kyç të institucioneve lokale, bashkëpunimit ndërinstitucional dhe dialogut të hapur për ndërtimin e një shoqërie më gjithëpërfshirëse dhe të barabartë.

Emisioni “FOKUSI YNË”është publikuar me mbështetje financiare të Bashkimit Evropian.  Përmbajtja e emisionit është përgjegjësi e organizatës Prosperiteti  dhe nuk pashqyron domosdoshmërisht  qëndrimet e Bashkimit Evropian .

Me gjersisht ndiqni intervisten :