Sonte, në hapësirën e Shkollës Fillore dhe të Mesme të Ulët “Rudolf Walther”, paralelja e ndarë në Dobidol, u përurua një fushë sportive bashkëkohore. Në këtë ngjarje morën pjesë kryetari i Komunës së Rahovecit, Smajl Latifi, shefi i Zyrës për Komunitete dhe Kthim, Lendrit Qeli, si dhe mësimdhënës, nxënës dhe qytetarë të Dobidolit. Të pranishmit festuan përurimin e tri investimeve kyçe: mjediset sportive për futboll, basketboll dhe volejboll; riparimin e brendshëm dhe të jashtëm të objektit të shkollës; dhe rrethojën e oborrit të shkollës.

Kryetari i Komunës së Rahovecit, Smajl Latifi, theksoi rëndësinë e këtij investimi për komunitetin, duke u shprehur: “Ky terren është shumë i rëndësishëm për shkollën dhe fshatin. Ai ofron një mundësi të shkëlqyer për të rinjtë që të zhvillojnë aftësitë e tyre sportive dhe të angazhohen në aktivitete rekreative. Investime të tilla janë jetike për të promovuar një jetesë aktive dhe të shëndetshme, dhe për të ndihmuar në integrimin e të gjithë qytetarëve pa dallim.”

Lendrit Qeli, shefi i Zyrës për Komunitete dhe Kthim dhe bashkëfinancues i projektit, theksoi që terreni do të jetë i hapur për të gjithë fëmijët, veçanërisht për komunitetet jo-shumicë si romët, ashkalinjtë dhe egjiptianët që jetojnë në këtë zonë. “Ky terren do të jetë pa dallim për të gjithë fëmijët, veçanërisht për ata nga komunitetet jo-shumicë që jetojnë këtu. Ne jemi të përkushtuar të ofrojmë mundësi të barabarta për të gjithë, dhe ky investim është një hap i madh në këtë drejtim,” tha Qeli.

Ky investim, bashkëfinancim i Organizatës “Advancing Together” dhe Zyrës Komunale për Komunitete dhe Kthim, do të përmbushë nevojat e shkollës dhe të gjithë komunitetit. Investimet në terrene sportive dhe projekte të tjera infrastrukturore do të vazhdojnë në vendbanime të tjera për të mirën e përgjithshme të qytetarëve dhe për një jetesë aktive dhe të shëndetshme.

Përurimi i fushës sportive bashkëkohore në Dobidol është një dëshmi e përkushtimit të vazhdueshëm për përmirësimin e infrastrukturës dhe ofrimin e mundësive të barabarta për të gjithë qytetarët, duke promovuar një ambient më të shëndetshëm dhe të integruar për të rinjtë dhe për komunitetet jo-shumicë në këtë zonë.