Në edicionin e fundit të emisionit “Fokusi Ynë”, i ftuar ishte z. Muhamet Elshani, përfaqësues i organizatës “Nevo Koncepti”, e cila prej më shumë se një dekade është angazhuar në fuqizimin e komuniteteve Rom, Ashkali dhe Egjiptian, me fokus të veçantë në fushën e arsimit.

Z. Elshani theksoi se organizata është e pranishme në disa komuna të Kosovës dhe zhvillon aktivitete të vazhdueshme në bashkëpunim me shkollat, institucionet lokale dhe partnerët ndërkombëtarë. Deri më tani, janë zbatuar dhjetëra projekte edukative që kanë sjellë rezultate konkrete në rritjen e përfshirjes së fëmijëve nga komunitetet në arsimin fillor dhe të mesëm.

Në përgjigje të pyetjes për programet më efikase, Elshani veçoi iniciativat për tutorim dhe mbështetje psikosociale për nxënësit, si dhe programet për vetëdijesim të prindërve, të cilat kanë kontribuar ndjeshëm në reduktimin e braktisjes shkollore dhe në përfshirjen e vajzave në shkollim, përfshirë edhe mësimin në gjuhën amtare për komunitetin Rom.

Bashkëpunimi me institucionet publike, sipas tij, është i domosdoshëm dhe “Nevo Koncepti” ka ndërtuar ura të forta komunikimi me autoritetet lokale dhe ato qendrore, megjithëse sfidat nuk mungojnë. Ndër problemet që ende mbesin të pazgjidhura përmendi mungesën e teksteve shkollore që reflektojnë kulturën dhe historinë e komuniteteve jo-shumicë.

Organizata gëzon mbështetjen e disa partnerëve ndërkombëtarë dhe organizatave vendore, përfshirë donatorë që kontribuojnë në zbatimin e projekteve. Për më tepër, “Nevo Koncepti” bazohet në raporte periodike për të analizuar suksesin dhe ndikimin e punës së saj.

Përveç arsimit, organizata angazhohet edhe në fusha të tjera si barazia gjinore, trajnime profesionale dhe avokim për të drejtat e komuniteteve. Elshani përmbylli intervistën me thirrjen që të gjithë aktorët të bashkëpunojnë më ngushtë për të ndërtuar një sistem arsimor më gjithëpërfshirës dhe të ndjeshëm ndaj diversitetit kulturor.

Ky diskutim i thelluar në “Fokusi Ynë” dëshmoi përkushtimin e “Nevo Koncepti” si një prej zërave më të fortë për avancimin arsimor dhe social të komuniteteve Rom, Ashkali dhe Egjiptian në Kosovë , me gjerësisht ndiqeni intervisten :

https://www.youtube.com/watch?v=sYcV4qDYJYo