Në studion e emisionit “Fokusi Ynë” e ftuar ishte znj. Mirjeta Qehaja, piktore profesioniste dhe figura e vetme egjiptiane që ka bërë emër në këtë fushë në Kosovë, aktualisht kandidate për doktoraturë në fushën e artit në Budapest dhe anëtare e Këshillit Konsultativ në Zyrën e Presidentes, duke përfaqësuar komunitetin egjiptian në nivel institucional. Pasioni i saj për artin ka nisur që në moshë të hershme dhe motivimi i saj ka qenë gjithmonë dëshira për të shprehur emocionet dhe identitetin përmes bojës dhe kornizës. Të jesh piktore profesioniste dhe njëkohësisht përfaqësuese e komunitetit nuk është detyrë e lehtë; Mirjeta tregon se kjo është një sfidë e bukur, ku arti shërben si shprehje personale, ndërsa angazhimi institucional kërkon përgjegjësi dhe përkushtim ndaj komunitetit. Si kandidate për doktoraturë, ajo përjeton një fazë të re akademike, duke thelluar njohuritë e saj artistike dhe sjellë perspektiva të reja në punën kreative, ndërkohë që mbështetja nga rrjeti artistik, komuniteti dhe institucionet ka qenë kyçe për realizimin e ekspozitave të shumta, të cilat janë mirëpritur nga publiku dhe kritikët. Frymëzimi i saj kryesor vjen nga familja, pasi babai dhe xhaxhai i saj ishin të talentuar në pikturë, një pasion që ajo e trashëgoi dhe e zhvilloi në karrierën e saj.

Ky element i trashëgimisë kulturore dhe artistike ndërthuret me stilin personal dhe teknikat bashkëkohore, duke treguar historitë, emocionet dhe pasionin e komunitetit përmes artit. Angazhimi i saj në Këshillin Konsultativ për Komunitete është një mision shoqëror i rëndësishëm, që i lejon të përfaqësojë komunitetin e saj dhe të luftojë për të drejtat e tij, megjithëse shpesh përballet me sfida për të siguruar përfaqësim të drejtë dhe mundësi të barabarta. Mirjeta inkurajon të rinjtë, veçanërisht vajzat nga komuniteti egjiptian, të ndjekin pasionin e tyre në art apo angazhim shoqëror dhe të besojnë se zëri i tyre mund të bëjë ndryshimin. Ajo është një shembull frymëzues se si arti dhe përfaqësimi institucional mund të bashkohen për të ndikuar pozitivisht tek komuniteti dhe shoqëria në përgjithësi.

Për më shumë detaje, ndiqeni intervistën e plotë të Mirjeta Qehajës në YouTube.